Liber Iob, Capitoli 22-27: BIBLE, Clementina Vulgata == BIBLE-CENTER

Liber Iob, Caput 22

¹ Respondens autem Eliphaz Themanites, dixit:

²Numquid Deo potest comparari homo,
etiam cum perfectæ fuerit scientiæ?

³Quid prodest Deo, si justus fueris?
aut quid ei confers, si immaculata fuerit via tua?

⁴Numquid timens arguet te,
et veniet tecum in judicium,

⁵et non propter malitiam tuam plurimam,
et infinitas iniquitates tuas?

⁶Abstulisti enim pignus fratrum tuorum sine causa,
et nudos spoliasti vestibus.

⁷Aquam lasso non dedisti,
et esurienti subtraxisti panem.

⁸In fortitudine brachii tui possidebas terram,
et potentissimus obtinebas eam.

⁹Viduas dimisisti vacuas,
et lacertos pupillorum comminuisti.

¹⁰Propterea circumdatus es laqueis,
et conturbat te formido subita.

¹¹Et putabas te tenebras non visurum,
et impetu aquarum inundantium non oppressum iri?

¹²an non cogitas quod Deus excelsior cælo sit,
et super stellarum verticem sublimetur?

¹³Et dicis: Quid enim novit Deus?
et quasi per caliginem judicat.

¹⁴Nubes latibulum ejus, nec nostra considerat,
et circa cardines cæli perambulat.

¹⁵Numquid semitam sæculorum custodire cupis,
quam calcaverunt viri iniqui,

¹⁶qui sublati sunt ante tempus suum,
et fluvius subvertit fundamentum eorum?

¹⁷Qui dicebant Deo: Recede a nobis:
et quasi nihil posset facere Omnipotens, æstimabant eum,

¹⁸cum ille implesset domos eorum bonis:
quorum sententia procul sit a me.

¹⁹Videbunt justi, et lætabuntur,
et innocens subsannabit eos:

²⁰nonne succisa est erectio eorum?
et reliquias eorum devoravit ignis?

²¹Acquiesce igitur ei, et habeto pacem,
et per hæc habebis fructus optimos.

²²Suscipe ex ore illius legem,
et pone sermones ejus in corde tuo.

²³Si reversus fueris ad Omnipotentem, ædificaberis,
et longe facies iniquitatem a tabernaculo tuo.

²⁴Dabit pro terra silicem,
et pro silice torrentes aureos.

²⁵Eritque Omnipotens contra hostes tuos,
et argentum coacervabitur tibi.

²⁶Tunc super Omnipotentem deliciis afflues,
et elevabis ad Deum faciem tuam.

²⁷Rogabis eum, et exaudiet te,
et vota tua reddes.

²⁸Decernes rem, et veniet tibi,
et in viis tuis splendebit lumen.

²⁹Qui enim humiliatus fuerit, erit in gloria,
et qui inclinaverit oculos, ipse salvabitur.

³⁰Salvabitur innocens:
salvabitur autem in munditia manuum suarum.

Liber Iob, Caput 23

¹ Respondens autem Job, ait:

²Nunc quoque in amaritudine est sermo meus,
et manus plagæ meæ aggravata est super gemitum meum.

³Quis mihi tribuat ut cognoscam et inveniam illum,
et veniam usque ad solium ejus?

⁴Ponam coram eo judicium,
et os meum replebo increpationibus:

⁵ut sciam verba quæ mihi respondeat,
et intelligam quid loquatur mihi.

⁶Nolo multa fortitudine contendat mecum,
nec magnitudinis suæ mole me premat.

⁷Proponat æquitatem contra me,
et perveniat ad victoriam judicium meum.

⁸Si ad orientem iero, non apparet;
si ad occidentem, non intelligam eum.

⁹Si ad sinistram, quid agam? non apprehendam eum;
si me vertam ad dexteram, non videbo illum.

¹⁰Ipse vero scit viam meam,
et probavit me quasi aurum quod per ignem transit.

¹¹Vestigia ejus secutus est pes meus:
viam ejus custodivi, et non declinavi ex ea.

¹²A mandatis labiorum ejus non recessi,
et in sinu meo abscondi verba oris ejus.

¹³Ipse enim solus est, et nemo avertere potest cogitationem ejus:
et anima ejus quodcumque voluit, hoc fecit.

¹⁴Cum expleverit in me voluntatem suam,
et alia multa similia præsto sunt ei.

¹⁵Et idcirco a facie ejus turbatus sum,
et considerans eum, timore sollicitor.

¹⁶Deus mollivit cor meum,
et Omnipotens conturbavit me.

¹⁷Non enim perii propter imminentes tenebras,
nec faciem meam operuit caligo.

Liber Iob, Caput 24

¹ Ab Omnipotente non sunt abscondita tempora:
qui autem noverunt eum,
ignorant dies illius.
² Alii terminos transtulerunt;
diripuerunt greges, et paverunt eos.
³ Asinum pupillorum abegerunt,
et abstulerunt pro pignore bovem viduæ.
⁴ Subverterunt pauperum viam,
et oppresserunt pariter mansuetos terræ.
⁵ Alii quasi onagri in deserto egrediuntur ad opus suum:
vigilantes ad prædam, præparant panem liberis.
⁶ Agrum non suum demetunt,
et vineam ejus, quem vi oppresserint, vindemiant.
⁷ Nudos dimittunt homines, indumenta tollentes,
quibus non est operimentum in frigore:
⁸ quos imbres montium rigant,
et non habentes velamen, amplexantur lapides.
⁹ Vim fecerunt deprædantes pupillos,
et vulgum pauperem spoliaverunt.
¹⁰ Nudis et incedentibus absque vestitu,
et esurientibus tulerunt spicas.
¹¹ Inter acervos eorum meridiati sunt,
qui calcatis torcularibus sitiunt.
¹² De civitatibus fecerunt viros gemere,
et anima vulneratorum clamavit:
et Deus inultum abire non patitur.
¹³ Ipsi fuerunt rebelles lumini:
nescierunt vias ejus,
nec reversi sunt per semitas ejus.
¹⁴ Mane primo consurgit homicida;
interficit egenum et pauperem:
per noctem vero erit quasi fur.
¹⁵ Oculus adulteri observat caliginem,
dicens: Non me videbit oculus:
et operiet vultum suum.
¹⁶ Perfodit in tenebris domos,
sicut in die condixerant sibi,
et ignoraverunt lucem.
¹⁷ Si subito apparuerit aurora, arbitrantur umbram mortis:
et sic in tenebris quasi in luce ambulant.
¹⁸ Levis est super faciem aquæ:
maledicta sit pars ejus in terra,
nec ambulet per viam vinearum.
¹⁹ Ad nimium calorem transeat ab aquis nivium,
et usque ad inferos peccatum illius.
²⁰ Obliviscatur ejus misericordia; dulcedo illius vermes:
non sit in recordatione,
sed conteratur quasi lignum infructuosum.
²¹ Pavit enim sterilem quæ non parit,
et viduæ bene non fecit.
²² Detraxit fortes in fortitudine sua,
et cum steterit, non credet vitæ suæ.
²³ Dedit ei Deus locum pœnitentiæ,
et ille abutitur eo in superbiam:
oculi autem ejus sunt in viis illius.
²⁴ Elevati sunt ad modicum, et non subsistent:
et humiliabuntur sicut omnia, et auferentur,
et sicut summitates spicarum conterentur.
²⁵ Quod si non est ita, quis me potest arguere esse mentitum,
et ponere ante Deum verba mea?

Liber Iob, Caput 25

¹ Respondens autem Baldad Suhites, dixit:

²Potestas et terror apud eum est,
qui facit concordiam in sublimibus suis.

³Numquid est numerus militum ejus?
et super quem non surget lumen illius?

⁴Numquid justificari potest homo comparatus Deo?
aut apparere mundus natus de muliere?

⁵Ecce luna etiam non splendet,
et stellæ non sunt mundæ in conspectu ejus:

⁶quanto magis homo putredo,
et filius hominis vermis?

Liber Iob, Caput 26

¹ Respondens autem Job dixit:

²Cujus adjutor es? numquid imbecillis?
et sustentas brachium ejus qui non est fortis?

³Cui dedisti consilium?
forsitan illi qui non habet sapientiam:
et prudentiam tuam ostendisti plurimam.

⁴Quem docere voluisti?
nonne eum qui fecit spiramentum?

⁵Ecce gigantes gemunt sub aquis,
et qui habitant cum eis.

⁶Nudus est infernus coram illo,
et nullum est operimentum perditioni.

⁷Qui extendit aquilonem super vacuum,
et appendit terram super nihilum.

⁸Qui ligat aquas in nubibus suis,
ut non erumpant pariter deorsum.

⁹Qui tenet vultum solii sui,
et expandit super illud nebulam suam.

¹⁰Terminum circumdedit aquis,
usque dum finiantur lux et tenebræ.

¹¹Columnæ cæli contremiscunt,
et pavent ad nutum ejus.

¹²In fortitudine illius repente maria congregata sunt,
et prudentia ejus percussit superbum.

¹³Spiritus ejus ornavit cælos,
et obstetricante manu ejus, eductus est coluber tortuosus.

¹⁴Ecce hæc ex parte dicta sunt viarum ejus:
et cum vix parvam stillam sermonis ejus audierimus,
quis poterit tonitruum magnitudinis illius intueri?

Liber Iob, Caput 27

¹ Addidit quoque Job, assumens parabolam suam, et dixit:

²Vivit Deus, qui abstulit judicium meum,
et Omnipotens, qui ad amaritudinem adduxit animam meam.

³Quia donec superest halitus in me,
et spiritus Dei in naribus meis,

⁴non loquentur labia mea iniquitatem,
nec lingua mea meditabitur mendacium.

⁵Absit a me ut justos vos esse judicem:
donec deficiam, non recedam ab innocentia mea.

⁶Justificationem meam, quam cœpi tenere, non deseram:
neque enim reprehendit me cor meum in omni vita mea.

⁷Sit ut impius, inimicus meus,
et adversarius meus quasi iniquus.

⁸Quæ est enim spes hypocritæ, si avare rapiat,
et non liberet Deus animam ejus?

⁹Numquid Deus audiet clamorem ejus,
cum venerit super eum angustia?

¹⁰aut poterit in Omnipotente delectari,
et invocare Deum omni tempore?

¹¹Docebo vos per manum Dei quæ Omnipotens habeat,
nec abscondam.

¹²Ecce vos omnes nostis:
et quid sine causa vana loquimini?

¹³Hæc est pars hominis impii apud Deum,
et hæreditas violentorum, quam ob Omnipotente suscipient.

¹⁴Si multiplicati fuerint filii ejus, in gladio erunt,
et nepotes ejus non saturabuntur pane:

¹⁵qui reliqui fuerint ex eo sepelientur in interitu,
et viduæ illius non plorabunt.

¹⁶Si comportaverit quasi terram argentum,
et sicut lutum præparaverit vestimenta:

¹⁷præparabit quidem, sed justus vestietur illis,
et argentum innocens dividet.

¹⁸Ædificavit sicut tinea domum suam,
et sicut custos fecit umbraculum.

¹⁹Dives, cum dormierit, nihil secum auferet:
aperiet oculos suos, et nihil inveniet.

²⁰Apprehendet eum quasi aqua inopia:
nocte opprimet eum tempestas.

²¹Tollet eum ventus urens, et auferet,
et velut turbo rapiet eum de loco suo.

²²Et mittet super eum, et non parcet:
de manu ejus fugiens fugiet.

²³Stringet super eum manus suas,
et sibilabit super illum, intuens locum ejus.


	After registering, you can subscribe to any Bible reading plan. Personalized settings and other services for registered users are planned, so we recommend registering now. Registration is free.