1 Сказꙋ́ю же ва́мъ, бра́тїе, бл҃говѣствова́нїе, є҆́же
благовѣсти́хъ ва́мъ, є҆́же и҆ прїѧ́сте, въ не́мже
и҆ стоитѐ,
|
2 и҆́мже и҆ спаса́етесѧ, ка́цѣмъ сло́вомъ благовѣсти́хъ
ва́мъ, а҆́ще содержитѐ: ра́звѣ а҆́ще не всꙋ́е вѣ́ровасте.
|
3 Преда́хъ бо ва́мъ и҆спе́рва, є҆́же и҆ прїѧ́хъ,
ꙗ҆́кѡ хрⷭ҇то́съ ᲂу҆́мре грѣ̑хъ на́шихъ ра́ди, по
писа́нїємъ,
|
4 и҆ ꙗ҆́кѡ погребе́нъ бы́сть, и҆ ꙗ҆́кѡ воста̀ въ
тре́тїй де́нь, по писа́нїємъ,
|
5 и҆ ꙗ҆́кѡ ꙗ҆ви́сѧ ки́фѣ, та́же є҆динона́десѧтимъ:
|
6 пото́мъ же ꙗ҆ви́сѧ бо́лѣ пѧтѝ сѡ́тъ бра́тїѧмъ
є҆ди́ною, ѿ ни́хже мно́жайшїи пребыва́ютъ досе́лѣ,
нѣ́цыи же и҆ почи́ша:
|
7 пото́мъ же ꙗ҆ви́сѧ і҆а́кѡвꙋ, та́же а҆пⷭ҇лѡмъ всѣ́мъ:
|
8 послѣди́ же всѣ́хъ, ꙗ҆́кѡ нѣ́коемꙋ и҆́звергꙋ,
ꙗ҆ви́сѧ и҆ мнѣ̀.
|
9 А҆́зъ бо є҆́смь мні́й а҆пⷭ҇лѡвъ, и҆́же нѣ́смь
досто́инъ нарещи́сѧ а҆пⷭ҇лъ, занѐ гони́хъ цр҃ковь
бж҃їю.
|
10 Блгⷣтїю же бж҃їею є҆́смь, є҆́же є҆́смь,
и҆ блгⷣть є҆гѡ̀, ꙗ҆́же во мнѣ̀, не тща̀ бы́сть,
но па́че всѣ́хъ и҆́хъ потрꙋди́хсѧ: не а҆́зъ же, но
блгⷣть бж҃їѧ, ꙗ҆́же со мно́ю.
|
11 А҆́ще ᲂу҆̀бо а҆́зъ, а҆́ще ли ѻ҆нѝ, та́кѡ проповѣ́дꙋемъ,
и҆ та́кѡ вѣ́ровасте.
|
12 (Заⷱ҇ 159.) А҆́ще же хрⷭ҇то́съ проповѣ́дꙋетсѧ,
ꙗ҆́кѡ и҆з̾ ме́ртвыхъ воста̀, ка́кѡ глаго́лютъ нѣ́цыи
въ ва́съ, ꙗ҆́кѡ воскрⷭ҇нїѧ ме́ртвыхъ нѣ́сть;
|
13 И҆ а҆́ще воскрⷭ҇нїѧ ме́ртвыхъ нѣ́сть, то̀ ни хрⷭ҇то́съ
воста̀:
|
14 а҆́ще же хрⷭ҇то́съ не воста̀, тщѐ ᲂу҆́бѡ проповѣ́данїе
на́ше, тща́ же и҆ вѣ́ра ва́ша.
|
15 Ѡ҆брѣта́емсѧ же и҆ лжесвидѣ́телє бж҃їи, ꙗ҆́кѡ
послꙋ́шествовахомъ на бг҃а, ꙗ҆́кѡ воскр҃сѝ хрⷭ҇та̀,
є҆гѡ́же не воскр҃сѝ, а҆́ще ᲂу҆́бѡ ме́ртвїи не
востаю́тъ:
|
16 а҆́ще бо ме́ртвїи не востаю́тъ, то̀ ни хрⷭ҇то́съ
воста̀:
|
17 а҆́ще же хрⷭ҇то́съ не воста̀, сꙋ́етна вѣ́ра ва́ша,
є҆щѐ є҆стѐ во грѣсѣ́хъ ва́шихъ:
|
18 ᲂу҆́бѡ и҆ ᲂу҆ме́ршїи ѡ҆ хрⷭ҇тѣ̀, погибо́ша.
|
19 (И҆) а҆́ще въ животѣ̀ се́мъ то́чїю ᲂу҆пова́юще
є҆смы̀ во хрⷭ҇та̀, ѡ҆каѧ́ннѣйши всѣ́хъ человѣ̑къ
є҆смы̀.
|
20 (Заⷱ҇ 160.) Нн҃ѣ же хрⷭ҇то́съ воста̀ ѿ ме́ртвыхъ,
нача́токъ ᲂу҆ме́ршымъ бы́сть.
|
21 Поне́же бо человѣ́комъ сме́рть (бы́сть), и҆ чл҃вѣ́комъ
воскрⷭ҇нїе ме́ртвыхъ.
|
22 Ꙗ҆́коже бо ѡ҆ а҆да́мѣ всѝ ᲂу҆мира́ютъ, та́кожде
и҆ ѡ҆ хрⷭ҇тѣ̀ всѝ ѡ҆живꙋ́тъ,
|
23 кі́йждо же во свое́мъ чинꙋ̀: нача́токъ хрⷭ҇то́съ,
пото́мъ же хрⷭ҇тꙋ̀ вѣ́ровавшїи въ прише́ствїи є҆гѡ̀.
|
24 Та́же кончи́на, є҆гда̀ преда́стъ црⷭ҇тво бг҃ꙋ
и҆ ѻ҆ц҃ꙋ̀, є҆гда̀ и҆спраздни́тъ всѧ́ко нача́льство
и҆ всѧ́кꙋ вла́сть и҆ си́лꙋ:
|
25 подоба́етъ бо є҆мꙋ̀ црⷭ҇твовати, до́ндеже положи́тъ
всѧ̑ врагѝ под̾ нога́ма свои́ма.
|
26 Послѣ́днїй же вра́гъ и҆спраздни́тсѧ сме́рть,
|
27 всѧ̑ бо покорѝ под̾ но́зѣ є҆гѡ̀: внегда́ же
рещѝ, ꙗ҆́кѡ всѧ̑ покорє́на сꙋ́ть є҆мꙋ̀, ꙗ҆́вѣ,
ꙗ҆́кѡ ра́звѣ поко́ршагѡ є҆мꙋ̀ всѧ̑.
|
28 Е҆гда́ же покори́тъ є҆мꙋ̀ всѧ́чєскаѧ, тогда̀
и҆ са́мъ сн҃ъ покори́тсѧ поко́ршемꙋ є҆мꙋ̀ всѧ́чєскаѧ,
да бꙋ́детъ бг҃ъ всѧ́чєскаѧ во всѣ́хъ.
|
29 (Заⷱ҇ 161.) Поне́же что̀ сотворѧ́тъ крестѧ́щїисѧ
ме́ртвыхъ ра́ди; А҆́ще ѿню́дъ ме́ртвїи не востаю́тъ,
что̀ и҆ креща́ютсѧ ме́ртвыхъ ра́ди;
|
30 Почто́ (же) и҆ мы̀ бѣды̑ прїе́млемъ на всѧ́къ
ча́съ;
|
31 По всѧ̑ дни̑ ᲂу҆мира́ю: та́кѡ мѝ ва́ша похвала̀,
бра́тїе, ю҆́же и҆́мамъ ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.
|
32 А҆́ще (бо) по человѣ́кꙋ со ѕвѣ́ремъ борѧ́хсѧ
въ є҆фе́сѣ, ка́ѧ мѝ по́льза, а҆́ще ме́ртвїи не
востаю́тъ; Да ꙗ҆́мы и҆ пїе́мъ, ᲂу҆́трѣ бо ᲂу҆́мремъ.
|
33 Не льсти́тесѧ: тлѧ́тъ ѡ҆бы̑чаи бл҃ги бесѣ̑ды ѕлы̑.
|
34 И҆стрезви́тесѧ првⷣнѡ и҆ не согрѣша́йте: невѣ́дѣнїе
бо бж҃їе нѣ́цыи и҆́мꙋтъ, къ сра́мꙋ ва́мъ глаго́лю.
|
35 Но рече́тъ нѣ́кто: ка́кѡ воста́нꙋтъ ме́ртвїи;
ко́имъ же тѣ́ломъ прїи́дꙋтъ;
|
36 Безꙋ́мне, ты̀ є҆́же сѣ́еши, не ѡ҆живе́тъ, а҆́ще
не ᲂу҆́мретъ:
|
37 и҆ є҆́же сѣ́еши, не тѣ́ло бꙋ́дꙋщее сѣ́еши,
но голо̀ зе́рно, а҆́ще слꙋчи́тсѧ, пшени́цы и҆лѝ и҆но́гѡ
ѿ про́чихъ:
|
38 бг҃ъ же дае́тъ є҆мꙋ̀ тѣ́ло, ꙗ҆́коже восхо́щетъ,
и҆ коемꙋ́ждо сѣ́мени своѐ тѣ́ло.
|
39 (Заⷱ҇ 162.) Не всѧ́ка пло́ть та́же пло́ть: но и҆́на
ᲂу҆́бѡ пло́ть человѣ́кѡмъ, и҆́на же пло́ть скотѡ́мъ,
и҆́на же ры́бамъ, и҆́на же пти́цамъ.
|
40 И҆ тѣлеса̀ небє́снаѧ, и҆ тѣлеса̀ земна̑ѧ: но
и҆́на ᲂу҆́бѡ небє́снымъ сла́ва, и҆ и҆́на земны̑мъ:
|
41 и҆́на сла́ва со́лнцꙋ, и҆ и҆́на сла́ва лꙋнѣ̀, и҆
и҆́на сла́ва ѕвѣзда́мъ: ѕвѣзда́ бо ѿ ѕвѣзды̀ ра́знствꙋетъ
во сла́вѣ.
|
42 Та́кожде и҆ воскрⷭ҇нїе ме́ртвыхъ: сѣ́етсѧ въ тлѣ́нїе,
востае́тъ въ нетлѣ́нїи:
|
43 сѣ́етсѧ не въ че́сть, востае́тъ въ сла́вѣ: сѣ́етсѧ
въ не́мощи, востае́тъ въ си́лѣ:
|
44 сѣ́етсѧ тѣ́ло дꙋше́вное, востае́тъ тѣ́ло дꙋхо́вное.
Е҆́сть тѣ́ло дꙋше́вное, и҆ є҆́сть тѣ́ло дꙋхо́вное.
|
45 Та́кѡ и҆ пи́сано є҆́сть: бы́сть пе́рвый человѣ́къ
а҆да́мъ въ дꙋ́шꙋ жи́вꙋ, послѣ́днїй а҆да́мъ въ дх҃ъ
животворѧ́щь.
|
46 Но не пре́жде дꙋхо́вное, но дꙋше́вное, пото́мъ
же дꙋхо́вное.
|
47 (Заⷱ҇ 163.) Пе́рвый человѣ́къ ѿ землѝ, пе́рстенъ:
вторы́й чл҃вѣ́къ гдⷭ҇ь съ нб҃сѐ.
|
48 Ꙗ҆ко́въ пе́рстный, таковѝ и҆ пе́рстнїи: и҆ ꙗ҆ко́въ
нбⷭ҇ный, та́цы же и҆ нбⷭ҇нїи:
|
49 и҆ ꙗ҆́коже ѡ҆блеко́хомсѧ во ѡ҆́бразъ пе́рстнагѡ,
да ѡ҆блече́мсѧ и҆ во ѡ҆́бразъ нбⷭ҇нагѡ.
|
50 Сїе́ же глаго́лю, бра́тїе, ꙗ҆́кѡ пло́ть и҆ кро́вь
црⷭ҇твїѧ бж҃їѧ наслѣ́дити не мо́гꙋтъ, нижѐ тлѣ́нїе
нетлѣ́нїѧ наслѣ́дствꙋетъ.
|
51 Сѐ, та́йнꙋ ва́мъ глаго́лю: вси́ бо не ᲂу҆́спнемъ,
вси́ же и҆змѣни́мсѧ
|
52 вско́рѣ, во мгнове́нїи ѻ҆́ка, въ послѣ́дней
трꙋбѣ̀: вострꙋ́битъ бо, и҆ ме́ртвїи воста́нꙋтъ нетлѣ́нни,
и҆ мы̀ и҆змѣни́мсѧ:
|
53 подоба́етъ бо тлѣ́нномꙋ семꙋ̀ ѡ҆блещи́сѧ въ нетлѣ́нїе
и҆ ме́ртвенномꙋ семꙋ̀ ѡ҆блещи́сѧ въ безсм҃ртїе.
|
54 Е҆гда́ же тлѣ́нное сїѐ ѡ҆блече́тсѧ въ нетлѣ́нїе
и҆ сме́ртное сїѐ ѡ҆блече́тсѧ въ безсм҃ртїе, тогда̀
бꙋ́детъ сло́во напи́санное: поже́рта бы́сть сме́рть
побѣ́дою.
|
55 Гдѣ́ ти, сме́рте, жа́ло; гдѣ́ ти, а҆́де, побѣ́да;
|
56 Жа́ло же сме́рти грѣ́хъ: си́ла же грѣха̀ зако́нъ.
|
57 Бг҃ꙋ же бл҃годаре́нїе, да́вшемꙋ на́мъ побѣ́дꙋ
гдⷭ҇емъ на́шимъ і҆и҃съ хрⷭ҇то́мъ.
|
58 (Заⷱ҇ 164.) Тѣ́мже, бра́тїе моѧ̑ возлю́блєннаѧ,
тве́рди быва́йте, непостꙋ́пни, и҆збы́точествꙋюще въ
дѣ́лѣ гдⷭ҇ни всегда̀, вѣ́дѧще, ꙗ҆́кѡ трꙋ́дъ ва́шъ
нѣ́сть то́щь пред̾ гдⷭ҇емъ.
|