1 По трїе́хъ же лѣ́тѣхъ ᲂу҆вѣ́да і҆ꙋ́да, ꙗ҆́кѡ
дими́трїй селе́ѵковъ сы́нъ вплывѐ сквозѣ̀ приста́нище,
є҆́же при трі́поли, со мно́жествомъ крѣ́пкимъ и҆
кораблѧ́ми,
|
2 и҆ ѡ҆держа̀ странꙋ̀ и҆ ᲂу҆бѝ а҆нтїо́ха и҆ є҆гѡ̀
намѣ́стника лѷсі́ю.
|
3 А҆лкі́мъ же нѣ́кто бы́вый пре́жде а҆рхїере́й, во́лею
же ѡ҆скверни́выйсѧ во времена̀ смѣше́нїѧ, помы́сливъ,
ꙗ҆́кѡ никі́имъ ѡ҆́бразомъ нѣ́сть є҆мꙋ̀ спасе́нїѧ,
нижѐ прихожде́нїѧ ко ст҃о́мꙋ ѻ҆лтарю̀,
|
4 прїи́де ко царю̀ дими́трїю сто̀ пѧтьдесѧ́тъ пе́рвагѡ
лѣ́та, приносѧ̀ є҆мꙋ̀ вѣне́цъ зла́тъ и҆ фі́нїкъ,
къ си̑мъ же и҆ цвѣты̀, и҆̀же мнѧ́хꙋсѧ церко́внїи бы́ти:
и҆ въ де́нь ѻ҆́ный молча́ше.
|
5 Полꙋчи́въ же вре́мѧ безꙋ́мїю своемꙋ̀ содѣ́йствꙋющее,
при́званъ бы́сть дими́трїемъ на собо́ръ и҆ вопроше́нъ,
въ ко́емъ состоѧ́нїи и҆ совѣ́тѣ стоѧ́тъ і҆ꙋде́є;
|
6 Къ си̑мъ речѐ: глаго́лемїи ѿ і҆ꙋдє́й а҆сїде́є,
и҆́хже во́ждь і҆ꙋ́да маккаве́й, бра̑ни стро́ѧтъ и҆
ра̑спри воздвиза́ютъ, не допꙋска́юще ца́рствꙋ благостоѧ́нїѧ
полꙋчи́ти:
|
7 сегѡ̀ ра́ди ѿлꙋче́нъ прароди́тельскїѧ сла́вы,
си́рѣчь свѧщеннонача́льства, сѣ́мѡ нн҃ѣ прїидо́хъ,
|
8 пе́рвое ᲂу҆́бѡ ѡ҆ надлежа́щихъ царю̀ вѣ́рность
содержа́щь, второ́е же и҆ ѡ҆ свои́хъ гра́жданѣхъ промышлѧ́ѧ:
предрече́нныхъ бо безслове́сїемъ весьма̀ ро́дъ на́шъ
не ма́лѡ стра́ждетъ:
|
9 ка̑ѧждо же си́хъ позна́въ, ты̀, царю̀, ѡ҆ странѣ̀
и҆ ѡ҆ ѡ҆бстоѧ́нїи ро́да на́шегѡ проꙋразꙋмѣ́й по человѣколю́бїю,
є҆́же и҆́маши ко всѣ̑мъ благопрекло́нное:
|
10 доне́лѣже бо і҆ꙋ́да жи́въ є҆́сть, невозмо́жно
ми́ра полꙋчи́ти веще́мъ.
|
11 Сицєвы́мъ же речє́ннымъ бы́вшымъ ѿ негѡ̀,
а҆́бїе про́чїи дрꙋ́зи, враждꙋ̀ и҆мꙋ́щїи на і҆ꙋ́дꙋ,
разжего́ша дими́трїа.
|
12 Призва́въ же ско́рѡ никано́ра старѣ́йшинꙋ над̾
слона́ми и҆ воево́дою поста́вивъ і҆ꙋде́ею, посла̀,
|
13 да́въ за́повѣдь, самаго̀ ᲂу҆́бѡ і҆ꙋ́дꙋ ᲂу҆би́ти,
сꙋ́щихъ же съ ни́мъ расточи́ти, поста́вити же а҆лкі́ма
а҆рхїере́емъ превели́кагѡ хра́ма.
|
14 Тогда̀ ꙗ҆зы́цы ᲂу҆бѣ́гшїи и҆з̾ і҆ꙋде́и ѿ
і҆ꙋ́ды, стада́ми прихожда́хꙋ къ нїкано́рꙋ, і҆ꙋдє́йскаѧ
ѕлополꙋ̑чїѧ и҆ бѣ̑дства себѣ̀ благополꙋ̑чїѧ мнѧ́ще
бы́ти.
|
15 Слы́шавше же (і҆ꙋде́є) нїкано́рово прише́ствїе
и҆ нападе́нїе ꙗ҆зы́кѡвъ, посы́павшесѧ земле́ю, молѧ́хꙋ
поста́вившаго да́же до вѣ́ка лю́ди своѧ̑ и҆ прⷭ҇нѡ
съ ꙗ҆вле́нїемъ защища́ющаго свою̀ ча́сть.
|
16 Повелѣ́вшꙋ же воево́дꙋ, ско́рѡ ѿтꙋ́дꙋ дви́гнꙋшасѧ
и҆ смѣси́шасѧ съ ни́ми при гра́дцѣ деса́вли.
|
17 Сі́мѡнъ же бра́тъ і҆ꙋ́динъ срази́всѧ съ нїкано́ромъ,
ма́лѡ же ᲂу҆страши́всѧ внеза́пнагѡ ра́ди нахожде́нїѧ
сꙋпоста́тѡвъ.
|
18 Ѻ҆ба́че же слы́шавъ нїкано́ръ мꙋ́жество при і҆ꙋ́дѣ
сꙋ́щихъ и҆ благодꙋ́шїе, и҆́мже подвиза́ютсѧ за ѻ҆те́чество,
ᲂу҆боѧ́сѧ сꙋ́дъ кро́вїю сотвори́ти:
|
19 сегѡ̀ ра́ди посла̀ посїдѡ́нїа и҆ ѳеодо́та и҆ маттаѳі́ю
да́ти и҆ взѧ́ти десни́цꙋ.
|
20 Мно́гꙋ же ѡ҆ се́мъ бы́вшꙋ совѣ́тꙋ и҆ воево́дѣ
лю́демъ возвѣсти́вшꙋ и҆ бы́вшꙋ є҆диногла́сномꙋ всѣ́хъ
и҆зволе́нїю, соизво́лиша на ми̑рнаѧ
|
21 и҆ нареко́ша де́нь, во́ньже ѡ҆со́бнѡ сни́дꙋтсѧ
кꙋ́пнѡ. И҆ прїи́де. И҆ поста́виша разли̑чнаѧ сѣда̑лища.
|
22 Повелѣ́ же і҆ꙋ́да воѡрꙋжє́ннымъ бы́ти готѡ́вымъ
въ мѣ́стѣхъ прили́чныхъ, да не когда̀ ѿ сꙋпоста̑тъ
внеза́пꙋ ѕлодѣѧ́нїе бꙋ́детъ, и҆ подоба́ющꙋю бесѣ́дꙋ
ѻ҆́бще сотвори́ша.
|
23 Пребыва́ше же нїкано́ръ во і҆ерⷭ҇ли́мѣ и҆ нико́егѡже
ѕла̀ сотворѝ, стада́ же наро́дѡвъ со́бранныхъ ѿпꙋстѝ.
|
24 И҆мѣ́ѧше же і҆ꙋ́дꙋ всегда̀ въ лицы̀, дꙋше́внѡ
къ мꙋ́жꙋ преклони́сѧ:
|
25 моли́ же є҆го̀ ѡ҆жени́тисѧ и҆ ча̑да сотвори́ти.
Ѡ҆жени́сѧ, бла́гѡ поживѐ, ѻ҆бщежи́тельствоваше.
|
26 А҆лкі́мъ же ви́дѧ междꙋ̀ и҆́ми благопрїѧ́тство
и҆ бы̑вшаѧ совѣща̑нїѧ позна́въ, и҆́де къ дими́трїю
и҆ глаго́лаше, ꙗ҆́кѡ нїкано́ръ ѡ҆ ве́щехъ чꙋ̑ждаѧ
мꙋ́дрствꙋетъ: і҆ꙋ́дꙋ бо, навѣ́тника ца́рствꙋ, прее́мника
воспрїѧ̀ себѣ̀.
|
27 Ца́рь же воз̾ѧри́всѧ и҆ прелꙋка́выми ѡ҆клевєта́нїи
є҆гѡ̀ разсверѣ́пѣвъ, писа̀ нїкано́рꙋ глаго́лѧ:
ѡ҆ совѣща́нїихъ си́хъ тѧ́жко (мѝ є҆́сть) носи́ти:
повелѣва́ю тѝ маккаве́а свѧ́зана посла́ти ско́рѡ
во а҆нтїохі́ю.
|
28 Оу҆вѣ́давъ же ѡ҆ си́хъ нїкано́ръ, смѧте́сѧ и҆
тѧ́жкѡ терпѧ́ше завѣща̑ннаѧ ѿри́нꙋти, ничи́мже є҆го̀
мꙋ́жꙋ ѡ҆би́дѣвшꙋ.
|
29 Но поне́же царю̀ сопроти́витисѧ не бѣ̀ возмо́жно,
благовре́менства наблюда́ше хи́тростїю вое́нною сїѐ
соверши́ти.
|
30 Маккаве́й же ви́дѧ над̾ собо́ю гро́знѣе дѣ́юща
нїкано́ра и҆ ѡ҆быкнове́нное срѣ́тенїе свирѣ́пѣе
и҆мꙋ́ща, ᲂу҆разꙋмѣ́въ не ѿ бла́га бы́ти сꙋровствꙋ̀
семꙋ̀, собра́въ не ма́лѡ сꙋ́щихъ ѡ҆́крестъ себє̀,
скры́сѧ ѿ нїкано́ра.
|
31 Позна́въ же дрꙋгі́й, ꙗ҆́кѡ до́бльственнѡ ѿ мꙋ́жа
хи́тростїю предваре́нъ, прише́дъ къ вели́комꙋ и҆ свѧто́мꙋ
хра́мꙋ, свѧще́нникѡмъ подоба́ющыѧ жє́ртвы приносѧ́щымъ
повелѣ̀ преда́ти мꙋ́жа.
|
32 Си̑мъ же съ клѧ́твою ре́кшымъ, ꙗ҆́кѡ не вѣ́дѧтъ,
гдѣ̀ є҆́сть и҆ско́мый, просте́ръ десни́цꙋ на це́рковь,
си́ми клѧ́тсѧ:
|
33 а҆́ще не предадите́ ми свѧ́зана і҆ꙋ́дꙋ, то̀ бж҃їй
хра́мъ ра́венъ со земле́ю сотворю̀, и҆ ѻ҆лта́рь раскопа́ю,
и҆ ка́пище дїонѵ́сꙋ сла́вное возста́влю здѣ̀.
|
34 И҆ сїѧ̑ ре́къ ѿи́де. Жерцы́ же воздѣ́юще рꙋ́цѣ
на не́бо, призыва́хꙋ сꙋ́щаго всегда̀ спобо́рника ꙗ҆зы́кꙋ
своемꙋ̀, сїѧ̑ рекꙋ́ще:
|
35 ты̀, гдⷭ҇и всѣ́хъ, не тре́бꙋѧй ничто́же, благоволи́лъ
є҆сѝ хра́мꙋ ѡ҆бита́нїѧ твоегѡ̀ бы́ти въ на́съ:
|
36 и҆ нн҃ѣ, ѽ, ст҃е, всѧ́кагѡ ѡ҆сщ҃е́нїѧ гдⷭ҇и,
сохранѝ во вѣ́къ нескве́рненъ се́й хра́мъ неда́внѡ
ѡ҆чище́нный, загради́ же всѧ̑ка ᲂу҆ста̀ непра́вєдна.
|
37 Разі́й же нѣ́кто ѿ старѣ́йшинъ і҆ерⷭ҇ли́мскихъ
ѡ҆клевета́нъ бы́сть нїкано́рꙋ, мꙋ́жъ люби́тель гра́жданъ
и҆ ѕѣлѡ̀ до́брѣ словꙋ́щь и҆ по благопрїѧ́тствꙋ ѻ҆те́цъ
і҆ꙋде́ѡмъ и҆менꙋ́емый:
|
38 бѧ́ше бо внесы́й въ пре́жнихъ временѣ́хъ несмѣше́нїѧ
сꙋ́дъ во і҆ꙋде́йствѣ, и҆ тѣ́ло и҆ дꙋ́шꙋ за і҆ꙋде́йство
предаѧ́ше со всѧ́кимъ ᲂу҆се́рдїемъ.
|
39 Хотѧ́щь же нїкано́ръ ꙗ҆́внꙋ сотвори́ти не́нависть,
ю҆́же и҆мѣ̀ на і҆ꙋдє́и, посла̀ во́инѡвъ бо́лѣе
пѧтѝ сѡ́тъ ꙗ҆́ти є҆го̀.
|
40 Мнѧ́ше бо, ꙗ҆́кѡ ѻ҆́наго поима́въ, си̑мъ содѣ́лаетъ
бѣдꙋ̀.
|
41 Мно́жествꙋ же наро́да хотѧ́щꙋ сто́лпъ ѡ҆бдержа́ти
и҆ дворѡ́выѧ двє́ри разрꙋша́ющꙋ, и҆ повелѣ́вшꙋ ѻ҆́гнь
принестѝ и҆ двє́ри зажещѝ, ѡ҆б̾ѧ́тъ ѿвсю́дꙋ
бы́въ, мече́мъ порази́сѧ,
|
42 лꙋ́чше до́бльственнѡ хотѧ́щь ᲂу҆мре́ти, не́жели
беззако́нникѡмъ подрꙋ́чникъ бы́ти и҆ своѐ благоро́дство
недосто́йнѣ ѡ҆безче́стити.
|
43 Ско́рости же ра́ди по́двига несме́ртна ꙗ҆́зва
бы́сть, и҆ наро́дѡмъ внꙋ́трь две́рїй врѣ́ѧвшымсѧ,
восте́къ де́рзостнѡ на стѣ́нꙋ, све́рже са́мъ себѐ
мꙋ́жественнѡ на наро́ды.
|
44 Ѡ҆́нымъ же ско́рѡ разбѣ́гшымсѧ и҆ бы́вшꙋ разстоѧ́нїю,
падѐ среди́ною чре́ва посредѣ̀ и҆́хъ:
|
45 є҆ще́ же ды́шꙋщь и҆ разжже́нъ дꙋше́ю, воста́въ,
кро́ви є҆гѡ̀ пото́комъ текꙋ́щей и҆ тѧжча́йшымъ ра́намъ
сꙋ́щымъ, бѣжа́щь сквозѣ̀ наро́ды про́йде,
|
46 и҆ ста́въ на нѣ́коемъ ка́мени стремни́ннѣмъ,
весьма̀ ᲂу҆жѐ без̾ кро́ви бы́въ, и҆сто́ргнꙋвъ внꙋ́трєннѧѧ
(своѧ̑) и҆ взе́мъ ѻ҆бѣ́ма рꙋка́ма ве́рже на наро́ды:
и҆ призва́въ владѣ́ющаго живото́мъ и҆ дꙋ́хомъ, да
сїѧ̑ є҆мꙋ̀ па́ки возда́стъ, и҆ си́мъ ѡ҆́бразомъ живо́тъ
сконча̀.
|